ໃນວັນທີ 7-8 ກຸມພາ 2019 ຢູ່ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ມີການຈັດກອງປະຊຸມເຜີຍແຜ່ ມະຕິກອງປະຊຸມຄົບຄະນະ ຄັ້ງທີ 7 ຂອງຄະນະບໍລິຫານງານສູນກາງພັກ ສະໄໝທີ X, ພາຍໃຕ້ການເປັນປະທານໂດຍ ສະຫາຍ ສົມມາດ ພົລເສນາ, ກຳມະການສູນກາງພັກ, ເລຂາຄະນະພັກ, ລັດຖະມົນຕີກະຊວງ. ຊຶ່ງມີຄະນະພັກ-ຄະນະນຳທຸກຂັັ້ນ ພ້ອມທັງສະມາຊິກພັກ ແລະ ພະນັກງານ-ລັດຖະກອນ ພາຍໃນກະຊວງ ເຂົ້າຮ່ວມທັງໝົດ ຈຳນວນ 230 ສະຫາຍ, ຍິງ 57 ສະຫາຍ.
ຈຸດປະສົງຂອງການຈັດກອງປະຊຸມເຜີຍແຜ່ໃນຄັ້ງນີ້, ກໍ່ເພື່ອຮັບປະກັນ ເຮັດໃຫ້ການຈັດຕັ້ງແຜນເຊື່ອມຊຶມມະຕິກອງປະຊຸມຄົບຄະນະ ບໍລິຫານງານສູນກາງພັກ ຄັ້ງທີ 7 ສະໄໝທີ X ໃຫ້ບັນລຸຕາມຈຸດປະສົງ, ຄາດໝາຍທີ່ວາງໄວ້, ທັງເປັນການຜັນຂະຫຍາຍ ເນື້ອໃນມະຕິກອງປະຊຸມ ດັ່ງກ່າວ ໃຫ້ມີຄວາມໝາຍຄວາມສຳຄັນ ແລະ ມີເນື້ອໃນເລິກເຊິ່ງໄດ້ຮັບການເຜີຍແຜ່ ຢ່າງກວ້າງຂວາງທົ່ວເຖິງທຸກເປົ້າໝາຍ.
ກອງປະຊຸມໄດ້ເຊື່ອມຊຶມ 2 ເອກະສານສຳຄັນຄື: 1). ມະຕິການເພີ່ມທະວີການນຳພາແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ສ້າງຄວາມເຂັ້ມແຂງຂອງການຄຸ້ມຄອງມະຫາພາກ, ສະບັບເລກທີ 057/ຄບສພ, ລົງວັນທີ 19 ທັນວາ 2018, ໃຫ້ກຽດສະເໜີໂດຍ ສະຫາຍ ນາງ ບຸນຄຳ ວໍລະຈິດ, ກຳມະການສຳຮອງສູນກາງພັກ, ປະທານກວດກາພັກ, ຮອງລັດຖະມົນຕີ ແລະ 2). ມະຕິວ່າດ້ວຍການປັບປຸງຮາກຖານການເມືອງຂອງລະບອບປະຊາທິປະໄຕປະຊາຊົນໃຫ້ເຂັ້ມແຂງ ແລະ ໜັກແໜ້ນ, ເລກທີ 056/ຄບສ ລົງວັນທີ 19 ທັນວາ 2018, ເປັນກຽດສະເໜີໂດຍ ສະຫາຍ ບຸນມີ ພຸດທະວົງ, ຮອງເລຂາຄະນະພັກ, ຮອງລັດຖະມົນຕີ; ພາຍຫຼັງສຳເລັດການເຊື່ອມຊຶມແລ້ວ ບັນດາສະຫາຍຜູ້ເຂົ້າຮ່ວມຈະໄດ້ຄົ້ນຄວ້າປະກອບຄຳເຫັນພາຍໃນກຸ່ມຕາມຄຳແນະນຳເຈາະຈິ້ມ ຊຶ່ງແຕ່ລະກຸ່ມມີຄະນະປະຈຳພັກຊີ້ນຳ-ນຳພາ ໃນການຄົ້ນຄວ້າ. ນອກນີ້, ຍັງມີການປະກອບຄຳຄິດເຫັນລວມໃນທີ່ປະຊຸມ.
ໂອກາດດັ່ງກ່າວ, ສະຫາຍ ສົມມາດ ພົລເສນາ, ຍັງຮຽກຮ້ອງໃຫ້ຄະນະພັກ-ຄະນະນໍາ ແຕ່ລະຂັ້ນ ເປັນເຈົ້າການ ໃນການຈັດຕັ້ງເຊື່ອມຊຶມ ມະຕິກອງປະຊຸມຄົບຄະນະ ບໍລິຫານງານສູນກາງພັກ ຄັ້ງທີ 7 ສະໄໝທີ X ພ້ອມທັງໃຫ້ສຸມໃສ່ແກ້ໄຂບັນຫາທີ່ສຳຄັນ ໃນຂົງເຂດເສດຖະກິດ-ການເງິນ ກໍຄື ການກໍ່ສ້າງຮາກຖານການເມືອງ ຂອງລະບອບປະຊາທິປະໄຕປະຊາຊົນ ທີ່ຕິດພັນກັບພຶດຕິກຳຕົວຈິງຂອງຂະແໜງການຂອງຕົນ, ແກ້ໄຂບັນດາຈຸດອ່ອນຂໍ້ຄົງຄ້າງ, ຊອກໃຫ້ເຫັນບັນດາ ສາເຫດທີ່ເປັນພື້ນຖານ ແລະ ຕົ້ນຕໍ ເພື່ອວາງມາດຕະການ, ທິດທາງ, ວິທີການແກ້ໄຂທີ່ຖືກຕ້ອງ ສາມາດປະຕິບັດໄດ້ຢ່າງມີປະສິດທິພາບ ແລະ ປະສິດທິຜົນ.