ສະຖາບັນ​ຄົ້ນຄວ້າ​ ຊັບພະຍາກອນ​ທຳມະຊາດ​ ແລະ​ ສິ່ງແວດລ້ອມ

Natural Resources and Environment Research Institute (NRERI)

ກອງປະຊຸ່ມໃຫຍ່ຄະນະພັກຮາກຖານ ສະຖາບັນຄົ້ນຄວ້າ ແລະ ສະຖິຕິຊັບພະຍາກອນທຳມະຊາດ ແລະ ສິ່ງແວດລ້ອມຄັ້ງທີ່I

ກອງປະຊຸມໃຫຍ່ ຄັ້ງທີ I ຄະນະພັກຮາກຖານ ສະຖາບັນຄົ້ນຄວ້າ ແລະ ສະຖິຕິ ຊັບພະຍາກອນທຳມະຊາດ ແລະ ສິ່ງແວດລ້ອມ, ໄດ້ຈັດຂຶ້ນໃນຕອນເຊົ້າຂອງ ວັນທີ 27 ສິງຫາ 2020 ທີ່ຫ້ອງປະຊຸມ ກົມອຸຕຸນິຍົມ ແລະ ອຸທົກກະສາດ,

ໂດຍໃຫ້ກຽດເຂົ້າຮ່ວມຂອງ ສະຫາຍ ສົມມາດ ພົລເສນາ, ກຳມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ, ມີແຂກຖືກເຊີນຈາກຄະນະພັກຮາກຖານ, ບັນດາໜ່ວຍພັກ ອ້ອມຂ້າງ ກະຊວງ ແລະ ຜູ້ແທນສົມບູນ ເຂົ້າຮ່ວມທັງໝົດ 43 ສະຫາຍ, ຍິງ 8 ສະຫາຍ. ໃນກອງປະຊຸມ ສະຫາຍ ວິລະສັກ ຈຸນດາລາ ເລຂາຄະນະພັກຮາກຖານ ສະຖາບັນຄົ້ນຄວ້າ ແລະ ສະຖິຕິ ຊສ ໄດ້ຂຶ້ນຜ່ານບົດສະຫຼຸບ ການນໍາພາການເຄື່ອນໄຫວວຽກງານໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ, ຄະນະພັກຮາກຖານ ສະຖາບັນຄົ້ນຄວ້າ ແລະ ສະຖິຕິ ຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ຮັບການສ້າງຕັ້ງຂຶ້ນ ໂດຍການຕົກລົງຂອງຄະນະນຳ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ, ໂດຍໂຮມເອົາ ສະຖາບັນຄົ້ນຄວ້າ ຊັບພະຍາກອນທຳມະຊາດ ແລະ ສິ່ງແວດລ້ອມ (ສຄຊສ) ກັບ ສູນຂໍ້ມູນ-ຂ່າວສານ ຊັບພະຍາກອນທໍມະຊາດ ແລະ ສິ່ງແວດລ້ອມ (ສຂຊສ) ມາເປັນ ສະຖາບັນຄົ້ນຄວ້າ ແລະ ສະຖິຕິ ຊັບພະຍາກອນທຳມະຊາດ ແລະ ສິ່ງແວດລ້ອມ (ສຄສຊສ). ມີສະມາຊິກພັກ ທັງໝົດ 31 ສະຫາຍ, ຍິງ 7 ສະຫາຍ; ສຳຮອງ 3 ສະຫາຍ, ຍິງ 2 ສະຫາຍ, ມີພະນັກງານ-ລັດຖະກອນທັງໝົດ 82 ທ່ານ, ຍິງ 31 ທ່ານ ແລະ ປະກອບມີ 06 ພະແນກ. ໄປຄຽງຄູ່ກັບການຊີ້ນຳ-ນຳພາ ວຽກງານການເມືອງ-ແນວຄິດ, ວຽກງານປັບປຸງ ແລະ ກໍ່ສ້າງພັກ-ພະນັກງານ ຄະນະພັກຮາກຖານ ສະຖາບັນຄົ້ນຄວ້າ ແລະ ສະຖິຕິ ຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ເອົາໃຈໃສ່ ຊີ້ນຳ-ນຳພາ ຕໍ່ກັບວຽກງານວິຊາສະເພາະ ຕາມພາລະບົດບາດ ຢ່າງເຂັ້ມແຂງ ພ້ອມທັງຊຸກຍູ້ ແລະ ສ້າງຄວາມເຂັ້ມແຂງໃນຂັ້ນມະຫາພາກ ໃນຂອບເຂດການຄຸ້ມຄອງ ຂອງຕົນ ໃນຂົງເຂດວຽກງານ ການຄົ້ນຄວ້າ ຊັບພະຍາກອນທຳມະຊາດ ແລະ ສິ່ງແວດລ້ອມ ໂດຍສະເພາະໃນຂົງເຂດ ການພັດທະນາແບບຈຳລອງ, ວຽກງານການຕິດຕາມວິໄຈ ຄຸນນະພາບສິ່ງແວດລ້ອມ, ວຽກງານສືບຢັ່ງທາງໄກ ແລະ ແຜນທີ່, ວຽກງານສະຖິຕິ ແລະ ຂໍ້ມູນຂ່າວສານ. ຈາກນັ້ນ, ກອງປະຊຸມ ໄດ້ດຳເນີນການປ່ອນບັດເລືອກຕັ້ງເອົາຄະນະພັກຮາກຖານ ຊຸດໃໝ່ ເຊິ່ງມີຜູ້ລົງສະໝັກ ຈໍານວນ 7 ສະຫາຍ, ຍິງ 2 ສະຫາຍ. ກອງປະ¬ຊຸມຄັ້ງປະຖົມມະ¬ລຶກ ໄດ້ເປັນເອ¬ກະພາບເລືອກເອົາ: 1) ສະຫາຍ ວິລະສັກ ຈຸນດາຣາ ເປັນເລຂາຄະນະພັກຮາກຖານ, ຊີ້ນໍາລວມ; 2) ສະຫາຍ ສິງສະຫວັນ ສິງກາວົງໄຊ ເປັນຮອງເລຂາຄະນະພັກຮາກຖານ, ປະທານກວດກາ; 3) ສະຫາຍ ນາງ ເຊຕຸວັນ ພັນທະວົງສາ ເປັນກໍາມະການຄະນະພັກຮາກຖານ; 4) ສະຫາຍ ອິດທິພົນ ຈັນທະມາລິນ ເປັນກໍາມະການຄະນະພັກຮາກຖານ; 5) ສະຫາຍ ລັດສະໝີ ວໍລະລາດ ເປັນກໍາມະການຄະນະພັກຮາກຖານ. ພ້ອມກັນນັ້ນ ກອງປະຊຸມກໍ່ຍັງໄດ້ເລືອກເອົາຜູ້ແທນສົມບູນ ແລະ ສຳຮອງ ເພື່ອເຂົ້າຮ່ວມກອງປະຊຸມໃຫຍ່ຄັ້ງທີ II ຂອງ ອົງຄະນະພັກ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ ຈຳນວນ 18 ສະຫາຍ, ຍິງ 4 ສະຫາຍ ແລະ ສຳຮອງ 4 ສະຫາຍນຳອີກ. ໃນໂອກາດດັ່ງກ່າວ, ສະຫາຍ ສົມມາດ ພົລເສນາ ກຳມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ສະແດງຄວາມຍ້ອງ¬ຍໍຊົມເຊີຍ ຕໍ່ຄະນະພັກຮາກຖານ ສະຖາບັນຄົ້ນຄວ້າ ແລະ ສະຖິຕິ ຊສ ຊຸດເກົ່າ ທີ່ໄດ້ຊີ້ນໍາ – ນໍາພາ ສະມາຊິກພັກ, ພະນັກງານ ປະຕິບັດໜ້າທີ່ການເມືອງຂອງຕົນ ຊຶ່ງໄດ້ສະແດງໃຫ້ເຫັນຜົນງານທີ່ ຍາດມາໄດ້ໃນໄລຍະທີ່ຜ່ານມາ ແລະ ສະຫາຍເລຂາຄະນະພັກ ກະຊວງ ຍັງໄດ້ຊີ້ນຳໃຫ້ຄະນະພັກຮາກຖານ ຊຸດໃໝ່ ຕ້ອງໄດ້ສືບຕໍ່ນຳພາວຽກງານການເມືອງແນວຄິດ ໃຫ້ສະມາຊິກພັກ-ພະນັກງານ ຢ່າງເລິກເຊິ່ງ ເຖິງຖອງ, ເພີ່ມທະວີຄວາມສາມັກຄີ, ຄວາມເປັນເອກະພາບ ພາຍໃນຄະນະພັກຮາກຖານ ສົມທົບແໜ້ນ ກັບການຊີ້ນຳ-ນຳພາຂອງຄະນະພັກກະຊວງ ແລະ ບັນດາສະມາຊິກພັກທຸກສະຫາຍ ຈົ່ງຕັ້ງໜ້າຄົ້ນຄວ້າ ແລະ ເຊື່ອມຊຶມເອົາທິດທາງແຜນການທີ່ກອງປະຊຸມໃຫຍ່ຄັ້ງນີ້ວາງອອກ ເພື່ອນຳໄປຈັດຕັ້ງປະຕິບັດໃຫ້ໄດ້ຮັບຜົນເປັນຢ່າງດີ, ພ້ອມດຽວກັນນີ້ ກໍ່ໃຫ້ເພີ່ມທະວີຄວາມສາມັກຄີເປັນປຶກແຜ່ນ, ມີສະຕິຕໍ່ການຈັດຕັ້ງ, ນັບຖືລະບຽບວິໄນ ແລະ ຝຶກຝົນຫຼໍ່ຫຼອມຕົນເອງໃນທຸກດ້ານ.